Վերադարձ և գումարի վերադարձ

Ուժի մեջ է՝ 2026 թվականի հոկտեմբերի 21-ից։

Սույն կանոններն ԱԲԱ ֆարմի (այսուհետ՝ Վաճառող) Հանրային օֆերտայի և վաճառքի պայմանների անբաժանելի մասն են։ Դրանք կարգավորում են www.abapharm.am կայքով (այսուհետ՝ Կայք) գնորդի (այսուհետ՝ Գնորդ) գնած ապրանքների վերադարձը, ապրանքի որակի վերաբերյալ պահանջները և գումարի վերադարձը։ Սույն կանոններով կամ օրենքով չնախատեսված վերադարձ կամ փոխանակում չի կատարվում։

1. Պատվերի ստուգումը ստանալիս

• Պատվերը ստանալիս՝ առաքիչի ներկայությամբ, Գնորդը պարտավոր է ստուգել ապրանքները, քանակը, փաթեթավորման ամբողջականությունը և պիտանելիության ժամկետները և անհապաղ առաքիչին հայտնել տեսանելի վնասվածքների, պակասորդի կամ ոչ այն ապրանքի մասին։ Նման թերությամբ ապրանքից Գնորդը կարող է հրաժարվել հանձնման պահին․ այդ դեպքում դրա արժեքը չի գանձվում կամ վերադարձվում է։
• Նման ստուգմամբ հայտնաբերելի տեսանելի վնասվածքների, պակասորդի կամ ոչ այն ապրանքի վերաբերյալ պահանջները, որոնք չեն ներկայացվել հանձնման պահին, կարող են մերժվել։ Թաքնված թերությունների վերաբերյալ պահանջները քննարկվում են սույն կանոնների 4-րդ բաժնով սահմանված կարգով։
• Ապրանքի պատահական կորստի կամ վնասման ռիսկը Գնորդին է անցնում ապրանքը փաստացի ստանալու պահից («Սպառողների իրավունքների պաշտպանության մասին» ՀՀ օրենքի 24.11-րդ հոդված)։ Վաճառողը պատասխանատվություն չի կրում հանձնումից հետո ապրանքի պահպանման, տեղափոխման կամ օգտագործման հետևանքով առաջացած վնասի համար։

2. Դեղեր

• «Դեղերի մասին» ՀՀ օրենքի 25-րդ հոդվածի 7-րդ մասի համաձայն՝ դեղատնից վաճառված պատշաճ որակի դեղն ենթակա չէ փոխարինման կամ վերադարձման։ Սա վերաբերում է Կայքով պատվիրված բոլոր դեղերին՝ անկախ այն բանից, բացվել է փաթեթավորումը, թե ոչ։
• Վաճառողը դեղը փոխարինում է նույն դեղով կամ վերադարձնում է դրա արժեքը միայն այն դեպքում, եթե՝
  • առաքված դեղը, դեղաչափը, դեղաձևը կամ քանակը չի համապատասխանում հաստատված պատվերին;
  • փաթեթավորումը հանձնման պահին վնասված էր կամ բացված, և այդ մասին հայտնվել է հանձնման պահին;
  • դեղի պիտանելիության ժամկետը հանձնման պահին լրացել էր;
  • դեղն ունի որակի թերություն կամ հետ է կանչվել լիազոր մարմնի կամ արտադրողի կողմից։
• Պահանջը ներկայացվում է սույն կանոնների 4-րդ բաժնով սահմանված կարգով։

3. Ոչ դեղային ապրանքներ՝ հրաժարում 14 օրվա ընթացքում

Ոչ դեղային ապրանքների (կոսմետիկ միջոցներ, հիգիենայի պարագաներ, երեխաների խնամքի ապրանքներ, բժշկական նշանակության արտադրատեսակներ և այլն) դեպքում Գնորդը կարող է առանց պատճառաբանության հրաժարվել պայմանագրից ապրանքն ստանալու օրվանից 14 օրվա ընթացքում («Սպառողների իրավունքների պաշտպանության մասին» ՀՀ օրենքի 24.4-րդ հոդված)։ Եթե մեկ պատվերի ապրանքներն առաքվել են առանձին, ժամկետը հաշվարկվում է վերջին ապրանքն ստանալու օրվանից։

Պայմաններ

• ապրանքը չի օգտագործվել, պահպանել է ապրանքային տեսքը և սպառողական հատկությունները և վերադարձվում է ամբողջական կազմով՝ գործարանային փաթեթավորմամբ, բոլոր պիտակներով, ներդիրներով և պարագաներով;
• կապարակնքված այն ապրանքները, որոնք առողջապահական կամ հիգիենիկ նկատառումներով ենթակա չեն վերադարձման, ընդունվում են միայն չվնասված գործարանային կապարակնիքով (տե՛ս ստորև ներկայացված ցանկը);
• ներկայացվում է ՀԴՄ կտրոնի բնօրինակը կամ Վաճառողից գնումը հավաստող այլ փաստաթուղթ;
• հրաժարվելու մասին ծանուցումը տրվել է, և ապրանքը վերադարձվել է ստորև նշված ժամկետներում։

Վերադարձի ենթակա չեն

«Սպառողների իրավունքների պաշտպանության մասին» ՀՀ օրենքի 24.9-րդ հոդվածի և 23-րդ հոդվածի 2-րդ մասի համաձայն՝ վերադարձի ենթակա չեն՝

• կապարակնքված այն ապրանքները, որոնք առողջապահական կամ հիգիենիկ նկատառումներով ենթակա չեն վերադարձման, եթե դրանց կապարակնիքը բացվել է հանձնումից հետո, այդ թվում՝ կոսմետիկ և մաշկի խնամքի միջոցները, բերանի խոռոչի խնամքի միջոցները, կոնտակտային ոսպնյակները և դրանց լուծույթները, ինտիմ հիգիենայի միջոցները, ախտորոշիչ թեստերը, պահպանակները, սննդային հավելումները, երեխաների սնուցման և խնամքի՝ մարմնի հետ շփվող պարագաները, անհատական օգտագործման բժշկական արտադրատեսակները;
• արագ փչացող կամ որակը փոփոխող ապրանքները, այդ թվում՝ մանկական սնունդը և պահման հատուկ ջերմաստիճանային ռեժիմ պահանջող ապրանքները;
• Գնորդի պատվերով պատրաստված կամ անհատականացված ապրանքները;
• նշված օրենքի 23-րդ հոդվածի 2-րդ մասով սահմանված այլ ապրանքները։

Կարգը

1. Ծանուցում։ Ապրանքն ստանալուց հետո 14 օրվա ընթացքում Գնորդը միանշանակ ձևով ծանուցում է Վաճառողին պայմանագրից հրաժարվելու մասին՝ նախընտրելի է էլ. նամակով info@abapharm.am հասցեին կամ գրավոր՝ ԱԲԱ ֆարմի դեղատանը, նշելով պատվերի համարը, ապրանքները և դրանց քանակը։ Հեռախոսով տրված ծանուցումը ցանկալի է հաստատել էլ. նամակով։ Ծանուցումը ժամկետում տրված լինելու ապացուցման պարտականությունը կրում է Գնորդը (օրենքի 24.5-րդ հոդված)։
2. Ապրանքի վերադարձ։ Ծանուցումից հետո ոչ ուշ, քան 14 օրվա ընթացքում, Գնորդն ապրանքը հանձնում է Երևանում ԱԲԱ ֆարմի ցանկացած դեղատուն (հասցեները՝ Դեղատներ էջում)։ Գնորդի խնդրանքով ապրանքը կարող է վերցվել առաքիչի միջոցով՝ 1 000 դրամ վճարով։ Ապրանքի վերադարձման ծախսերը կրում է Գնորդը (օրենքի 24.8-րդ հոդվածի 2-րդ մաս)։
3. Ստուգում։ Ապրանքը ստուգվում է ընդունելիս։ Վերը նշված պայմաններին չհամապատասխանող ապրանքը չի ընդունվում և վերադարձվում է Գնորդին։
4. Գումարի վերադարձ։ Վաճառողն ապրանքի արժեքը վերադարձնում է ծանուցումն ստանալուց հետո 14 օրվա ընթացքում՝ վճարման նույն եղանակով (օրենքի 24.7-րդ հոդվածի 1-ին մաս)։ Վաճառողը կարող է հետաձգել գումարի վերադարձը մինչև ապրանքը հետ ստանալը կամ մինչև Գնորդի կողմից ապրանքը հետ ուղարկելու ապացույց ներկայացնելը (օրենքի 24.7-րդ հոդվածի 3-րդ մաս)։
5. Արժեքի նվազում։ Եթե ապրանքի արժեքը նվազել է այն ոչ իր նպատակային նշանակությամբ օգտագործելու հետևանքով, Վաճառողը վերադարձվող գումարից պահում է արժեքի նվազման չափը (օրենքի 24.8-րդ հոդվածի 2-րդ մաս)։
6. Առաքման վճար։ Առաքման ստանդարտ վճարը վերադարձվում է միայն ամբողջ պատվերից հրաժարվելու դեպքում։ Ստանդարտից տարբերվող առաքման եղանակի լրացուցիչ ծախսերը չեն վերադարձվում (օրենքի 24.7-րդ հոդվածի 2-րդ մաս)։

4. Թերի, ժամկետանց, վնասված կամ ոչ այն ապրանք

• Եթե ապրանքն ունի թերություն, հանձնման պահին ժամկետանց էր կամ չի համապատասխանում հաստատված պատվերին, Գնորդը կարող է օգտվել օրենքով նախատեսված իրավունքներից (մասնավորապես՝ պահանջել ապրանքը փոխարինել նույն ապրանքով, իջեցնել գինը կամ վերադարձնել գումարը)։ Դեղերի դեպքում կիրառվում է սույն կանոնների 2-րդ բաժինը։
• Պահանջում պետք է նշվեն պատվերի համարը և թերության նկարագրությունը, իսկ անհրաժեշտության դեպքում կցվեն ապրանքի, փաթեթավորման, սերիայի համարի և պիտանելիության ժամկետի լուսանկարները։ Ապրանքը ներկայացվում է փաթեթավորմամբ և գնումը հավաստող փաստաթղթով։ Պահանջը կարող է ներկայացվել օրենքով սահմանված ժամկետներում, այդ թվում՝ ապրանքի պիտանելիության կամ երաշխիքային ժամկետի ընթացքում։
• Մինչև պահանջի վերաբերյալ որոշում կայացնելը Վաճառողը կարող է ստուգել ապրանքի որակը․ Գնորդն իրավունք ունի ներկա գտնվելու ստուգմանը։ Ստուգման արդյունքը վիճարկելու դեպքում փորձաքննությունն անցկացվում է օրենքով սահմանված կարգով։
• Պահանջը մերժվում է, եթե թերությունն առաջացել է հանձնումից հետո՝ ապրանքի ոչ պատշաճ պահպանման, տեղափոխման կամ օգտագործման, ներդիր-թերթիկի պահանջների խախտման, Գնորդի կամ երրորդ անձանց գործողությունների հետևանքով։ Այդ դեպքում Գնորդը, օրենքով նախատեսված դեպքերում, հատուցում է փորձաքննության և տեղափոխման ծախսերը։
• Հիմնավոր պահանջի դեպքում ապրանքի վերադարձման ծախսերը կրում է Վաճառողը․ ապրանքը կարող է հանձնվել Երևանում ԱԲԱ ֆարմի ցանկացած դեղատուն կամ անվճար վերցվել Վաճառողի առաքիչի կողմից։
• Հիմնավոր պահանջները բավարարվում են օրենքով սահմանված ժամկետներում։

5. Գումարի վերադարձ՝ պատվերի մերժման, փոփոխման կամ չեղարկման դեպքում

Առցանց վճարված պատվերի դեպքում գումարն ամբողջությամբ կամ տարբերությունը վերադարձվում է, եթե՝

• պատվերը մերժվել է դեղագետի կամ Վաճառողի կողմից՝ վաճառքի պայմաններին համապատասխան (օրինակ՝ ապրանքն առկա չէ կամ բացակայում է վավեր էլեկտրոնային դեղատոմսը);
• Գնորդը համաձայնել է նվազեցված պատվերին (վերադարձվում է տարբերությունը);
• Գնորդը մերժել է նվազեցված պատվերը կամ 48 ժամվա ընթացքում չի պատասխանել, և պատվերը չեղարկվել է;
• Գնորդը չեղարկել է պատվերը մինչև դրա հաստատումը;
• վճարումը ստացվել է պատվերի չեղարկումից հետո (օրինակ՝ վճարման 30 րոպեի ժամկետը լրանալուց հետո)։

Եթե պատվերը չի հանձնվել կամ մերժվել է Գնորդի մեղքով, Վաճառողը, օրենքով թույլատրելի չափով, կարող է վերադարձվող գումարից պահել առաքման վճարը և կատարված այլ անհրաժեշտ ծախսերը։

6. Գումարի վերադարձի եղանակը և ժամկետը

• Բանկային քարտ՝ գումարը վերադարձվում է նույն քարտին։ Քարտին գումարի մուտքագրման ժամկետը կախված է Գնորդի բանկից։
• Idram՝ գումարը վերադարձվում է նույն Idram դրամապանակին։
• Կանխիկ վճարում՝ մինչև առաքումը գումար չի գանձվում, ուստի չեղարկված պատվերի դեպքում վերադարձ չի պահանջվում։ Կանխիկ վճարված գումարը վերադարձվում է կանխիկ՝ ԱԲԱ ֆարմի դեղատանը, կամ Գնորդի նշած բանկային հաշվին փոխանցմամբ՝ անկանխիկ գործարքների մասին օրենսդրությամբ սահմանված սահմանափակումներով։
• Սույն կանոնների 5-րդ բաժնով նախատեսված գումարները վերադարձվում են պատվերի մերժումից, փոփոխումից կամ չեղարկումից հետո 14 օրվա ընթացքում, իսկ պայմանագրից հրաժարվելու դեպքում՝ 3-րդ բաժնով սահմանված կարգով։ Վաճառողը պատասխանատվություն չի կրում բանկերի կամ վճարային համակարգերի պատճառով առաջացած ուշացումների համար։

7. Կապ

Պահանջները և պայմանագրից հրաժարվելու մասին ծանուցումները ներկայացվում են info@abapharm.am էլ. հասցեով, ք. Երևան, Կարապետ Ուլնեցու փողոց 59/5 հասցեով կամ Երևանում ԱԲԱ ֆարմի ցանկացած դեղատանը։ Հեռախոս՝ +374 10 202032 (ամեն օր՝ 9:00–24:00)։

Սույն կանոնների իրավաբանորեն պարտադիր տարբերակը հայերենն է։